D’fhás mé aníos ar fheirm díreach lasmuigh de shráidbhaile ar a dtugtar an Droim, atá ar an teorainn idir Muineachán agus an Cabhán. Ba é Freddie m’athair agus ba í Emily mo mháthair. Ba mise an t-aon chailín i mo theaghlach agus bhí beirt deartháireacha níos óige agam, Bert agus Alan.

Feirm oibre a bhí ann. Thabharfaí jab duit gan mórán moille dá ndéarfá riamh go raibh leadrán ort! Bean iontach a d’oibrigh go dian a bhí i mo mháthair agus mhúin sí dom ó bhí mé i mo pháiste óg nach raibh jab ar bith ann nach bhféadfainn aghaidh a thabhairt air. Agus rinne mé gach rud dá bharr: Rinne mé na ba a bhleán; d’fhéadfainn tarracóir a thiomáint; chabhraigh mé leis an bhféar a bhaint; thug mé beatha do na laonna agus go leor leor rudaí eile ina measc. Ní bhíonn tú riamh díomhaoin agus tú i do chónaí ar fheirm, bíonn obair le déanamh i gcónaí.

Ba é m’athair an t-aon mhac agus chónaíomar dá bharr ar an bhfeirm le mo sheantuismitheoirí. Tá cuimhní áille agam de na trí ghlúin dínn go léir ag cónaí faoin díon céanna. Fuair mo sheanathair bás nuair a bhí mé 18 mbliana d’aois, agus fuair mo sheanmháthair bás cúpla bliain ina dhiaidh sin. Nuair a chuimhním siar, is mairg nár chuir mé níos mó ceisteanna orthu faoi conas mar a bhí an saol acu nuair a bhí siadsan óg. Ní ritheann na rudaí sin leat ach nuair a théann tú in aois agus, ar an drochuair, ní féidir le duine ar bith dínn an clog a chasadh siar.

D’fhreastail mé ar an Scoil Náisiúnta sa Droim. Scoil bheag tuaithe ab ea í nach raibh ach aon mhúinteoir amháin inti. Mar a tharla, ní raibh ach duine amháin eile i mo rang. Nuair a bhí orm freastal ar an meánscoil, d’fhreastail mé ar Scoil Chuimsitheach Aodáin Naofa, Pobalscoil i Muinchille. Scoil il-sainchreidmheach ab ea í agus cuireadh oideachas iontach orainn inti, oideachas a chuir ar bhealach mo leasa mé.

Chuaigh mé ag obair i mBanc Uladh ar chríochnú na scoile dom agus d’oibrigh mé ina dhiaidh sin mar Bhainisteoir Chomhar Creidmheasa Mhuinchille. Tá an Comhar Creidmheasa fréamhaithe go daingean sa phobal agus tá siad an-tiomanta ann d’fhreastal ar na daoine. Thiocfadh daoine isteach agus cabhair á lorg acu le rudaí éagsúla, d’fhéadfadh iasacht bheag a bheith ag teastáil chun cabhrú le híoc as na costais chun filleadh ar an scoil nó d’fhéadfadh sé go raibh an gluaisteán le deisiú. Chuir mé aithne sa Chomhar Creidmheasa ar dhaoine agus cuireadh in iúl dom na dúshláin a bhíodh rompu agus na fadhbanna a bhíodh le sárú acu in amanna.

Chuaigh mé leis an bpolaitíocht go hiomlán trí thimpiste. Bhí duine á lorg ag an Teachta Dála Seymour Crawford, nach maireann, chun teacht ina ionad i gComhairle Contae Mhuineacháin. Mhol comharsa mo dheartháir, Bert, dó. Bhí Bert bainteach i bhFeirmeoirí Aontaithe na hÉireann agus b’fheirmeoir mór é Seymour agus cheap sé go raibh an fear ceart aimsithe aige dá bharr. Dúirt an chomharsa ar fhágáil dó: Cad faoi Heather? Oibríonn sí sa Chomhar Creidmheasa. D’fhág Seymour an teach agus dhá ainm aige agus bhí dhá rogha aige agus é ag tiomáint síos an bóthar: casadh ar chlé go teach Bert nó ar dheis go teach Heather. Ar ámharaí an tsaoil, bhí Seymour chun tosaigh ar lucht a linne agus cheap sé gur theastaigh níos mó ban sa pholaitíocht agus chas sé i dtreo mo thí dá bharr. Ba é sin conas a bhain mé an pholaitíocht amach.

D’oibrigh mé le Comhairle Contae Mhuineacháin ó 2003 go 2011, tráth ar toghadh mé chun Dháil Éireann.  Cuireadh ionadh mór orm, mar a cuireadh ar an gcuid is mó den tír, nuair a ceapadh i m’aire rialtais mé in 2014 agus mé i mo Theachta Dála den chéad uair. Bhí an t-ádh orm fónamh sa Chomh-Aireacht ar feadh breis agus deich mbliana i measc réimse aireachtaí éagsúla. Thaitin an jab liom i gcónaí agus b’aoibhinn liom casadh agus caint le daoine, bíodh Comóradh 2016 a stiúradh, tacú le gnólachtaí i rith an Bhreatimeachta agus phaindéim Covid-19, reachtaíocht a achtú le haghaidh Rollú Uathoibríoch agus Sochar Pá-Choibhneasa, Béilí Teo a thabhairt isteach i mBunscoileanna nó tacú lenár bpobail tuaithe i gceist.

Tá an t-ádh dearg orm go dtacaíonn mo theaghlach liom agus go dtuigeann siad cé chomh tábhachtach is atá an tseirbhís phoiblí. Táim pósta le Eric agus tá beirt iníonacha againn, Eva agus Tara, agus tá an-ádh orm go bhfuil beirt mhac cleamhnais iontach, Seán agus Gerard, anois agam. Tá beirt gharleanaí áille agam, Arthur (4) agus Charlotte (1). Mar a tharlaíonn, tá m’iníon is óige, Tara, ag súil lena céad leanbh an mhí seo, mar sin, is cinnte go bhfuil bís an domhain orainn sa bhaile faoi láthair.